"Con i pantaloni rossi e la maglietta blue"...a stoia de l' "Inno" do Zena a commensa chì. A l'è na stoia che a dua da-o 72/73, l'anno da promozion do Silvestri, do Bordon, e de tanti atri campiuin...

L'ea stæto fæto un bando de concorso, aveivan partecipou in 40 (con 'na tascia de iscriziun de 10.000 franchi) e 'na Giuria con a cappo l'Enzo Tortora, doppo avei sentio tutti i tocchi in sce l'organo da gëxa da Consolazion, a n'aveiva tiou fêua 24.
In dexembre, a-a fea do mâ, in tre seiann-e, a-o zeuggia n'han sunnou 12 e o pubblico in sala o n'ha çernuo 6, idem a-o venerdì, e poi a-o sabbo gh'è stæta a finale. E con gran destacco, ha guagno "Un cantico per il mio Grifone", cantà da 40 studenti do Vittorio Emanuele, parolle mæ  e muxica do Giampiero Reverberi che pe o sò Zena, pe 'na votta, o l'ha anche tradio Lucio Battisti, Mina e tutti i atri pe i quæ o travaggiava alloa. O l'è stæto le, in quattro e quattr'êutto, a tiâ fêua quelle notte che son tanto entrè in to chêu di nostri figgieu e de tutta a Gradinata Nord.

Ma perché quello riferimento a-e braghe rosse e a-e maggette bleu? Perché o bando de concorso o precisava che e parolle doveivan avei un raciammo a-e caratteristiche do tifo genoano, e in te quelli anni, fra l'atro, a nostra zoventù a l'annava a-o campo proprio vestia coscì, dando -se ghe ne fuse stæto ancon bezêugno- n'atro maaveggioso colpo d'êuggio tutto rosso-bleu.

In te caratteristiche do nostro tifo mì g'aveivo anche misso a disperazion che provemmo quando "i atri" perdan: "Tornati a De Ferrari/festeggian la vittoria/ancora più contenti/quando perde la....", ma i organizzatui, e in particolare o Pippo Spagnollo, han dito che in to nostro inno no doveivimo parlà di atri, e coscì, con o Reverberi, l'emmo cangiou.

N'avevivo scrita anche 'natra, de quartinn-a, ma questa me l'eo censurâ da solo. A faxeiva: "Chi parla di fusione/lo fa per scherno o lazzo/fa solo confusione/non ha capito un c...o". E questa, comunque, a-a dedico a-o Garron e a chi a pensesse comme le.

Pe concludde, 'na curiositè. I nostri cuxi, con a fantasia che a-i contraddistingue, in seguito aveivan adottou come inno sò -cangiando quarche parolla- o toccu che a-o nostro concorso o l'ea arrivou quarto, quello che o faxeiva "Genoa olè, Genoa olè, forza Genoa Genoa olè". L'è comme avei guagno 4-0!

Con tante scuse a-e femministe che m'han accusou d'ese troppo maschilista quande, foscia con poca cavalleria, pà che se comande: "O donna, prepara...". Mì no a veddiô, ma stevene, che primma o doppo, quella stella a deve arrivà.

Piero Campodonico

Ascolta l'Inno!